Тренерот на Јувентус Масимилијано Алегри се надева дека тимот ќе реагира добро по елиминацијата од Лигата на шампионите. „Старата дама“ утре ќе игра со Лече во гости и ќе ја брка третата победа по ред во првенството.
„Ни остануваат пет важни натпревари, четири во Серија А и еден во ЛШ. Треба да се фокусираме на тоа. По паузата (по Мундијалот), кога сите играчи ќе се вратат, ќе биде поинаку. Тогаш очекувам да бидеме многу подобри“, изјави Алегри.
Алегри потврди дека Влаховиќ и Локатели ќе го пропуштат мечот со Лече. Тој додаде дека Погба и Киеза ќе го пропуштат мечот со ПСЖ идната седмица и сигурно ќе ги нема на дербито со Интер на 6 ноември.
„Поминаа само 11 кола, а бесмислено е да зборувам за „Скудетото“. Наполи прави прекрасни работи, истото важи и за Милан, Лацио, Интер и Рома. Ние заостануваме. Целта ни е да ја намалиме разликата. Пред нас е интересен меч. Лече освои бодови против Фиорентина и Салернитана, па се добро организирани и можат да бидат опасни од контри“, вели тренерот на Јувентус.
