После одиграни повеќе од 1.000 официјални мечеви за Барса, ПСЖ и Аргентина, после освоени толку титули, па и Копа Америка, после речиси 20 години кариера, денеска за Лео Меси е нај, најважниот меч во животот. Ова му е втора шанса, по онаа во Бразил 2014 на СП, кога на “Маракана“ загуби во финалето од Германија, да влезе во вечноста, да биде бесмртен, да биде нај, нај во историјата на фудбалот. Да ја освои титулата светски првак со Аргентина.
Пречката се вика Франција, потешко и не можеше, но затоа победата ќе биде послатка. Остануваат само уште 90 или 120 минути за да Лео стане најдобриот меѓу најдобрите во историјата.
Финалето за него ќе биде 26-ти меч на Мундијалите, ќе биде апсолутен рекордер, ако постигне гол или асистира ќе урне уште некој рекорд, но тоа сега е помалку битно.
Тука секако дека ќе биде и „духот“ на Диего, на Марадона, кој во 1986 ја израдува Аргентина, дали сега тоа ќе го стори Лео?
А досега, на овој Мундијал во Катар се некако потсетува на тие денови од летото во Мексико во 1986 година кога Диего беше едноставно перфектен.
Се разбира дека секој оној кој што го сака вистински фудбалот, онака од срце, денеска ќе биде со Лео, денеска ќе навива за Аргентина.
Денеска и Диего ќе “игра“ за Лео, за Аргентина. Денеска сите 45 милиони Аргентинци, најмалку 50.000 фанови на „Лусаил стадионот“ и милијарди вистинска фанови на фудбалот во светот посакуваат Лео да го дигне пехарот и да стане бесмртен, да влезе во фудбалската вечност.
Е, па, Лео, појди кон тоа што ти припаѓа, одведи ја Аргентина до трофејот, до “Божицата“, за да станаше најдобар меѓу најдобрите.
Секако дека и Диего ќе се радува, таму некаде од горе.
Е, па, Лео, ајде покажи дека кога е најголем притисокот,кога е најважно за тебе и твојата Аргентина, ќе покажеш дека си НАЈГОЛЕМИОТ.
Лео, уште оваа пречка треба да се прескокне..
