По оставката на претходното раководство, ФК Тетекс доби ново раководители кои ќе го водат клубот во битката за опстанок во второлигашкото друштво. Претседател на клубот ќе биде д-р Бобан Вучевски. Тетекс во моментов е во доста лоша состојба, без доволен фонд на играчи, минусно салдо и доста долгови. Нема и доволен број на фудбалери, но новото раководство ќе работи да го врати клубот на стабилни нозе.
„ Како што Ви е познато на повеќето од вас, па и на јавноста, клубот го наследуваме во лоша состојба, без соодветен кадар на фудбалери, соодветен стручен штаб, минусно салдо и долгови.
Затоа, нашата цел ќе биде да се обединиме, сите верни фанови, тетовчани, љубители на фудбалот и спортот со заеднички сили да го вратиме клубот онаму каде што припаѓа.
Ветуваме дека со сите сили ќе се бориме и секој натпревар во втората полусезона ќе го играме како да ни е финале. Значаен ќе биде секој гол, секој бод, секоја победа за наш опстанок и спас на клубот.
Воедно, испраќаме апел до сите заинтересирани, од различна професија ( поранешни и сегашни фудбалери, легенди, спортски доктори, тренери и сите останати ) кои можат да дадат некаков придонес во клубот, да се пријават.
Дел од нашата мисија во наредниот период ќе биде и посета на регионални компании за да побараме парична помош и финансиски да закрепнеме, за да не дозволиме згаснување на овој бренд кој функционира речиси 70 години.
Отворени сме за секој кој што смета дека може да помогне, и го повикуваме да се приклучи кон оваа иницијатива, затоа што само сите заедно, сплотени, верувам дека можеме многу повеќе да допринесеме са клубот и да успееме во нашиот план. Да донесеме големи резултати и да го вратиме ФК ТЕТЕКС на старите победнички патеки и славни времиња
Со особена чест и задоволство, дозволете ми да Ви ги претставам и останатите членови на Управниот одбор:
- Бобан Вучевски
- Ивица Хаџииљоски – Чајка
- Драгољуб Јовановски
- Перо Јовановски
- Живко Антовски
- Бобан Мишевски
- Ненад Спасоски – Зец
Ова е тим составен од искрени, добронамерни и угледни луѓе кои со срце го сакаат Тетекс и се подготвени да одговорат на сите предизвиците кои ни следуваат во наредниот период“, изјави Вучевски.
Тренер на клубот останува Дејан Савевски.
