Она што “Спортмедиа“ го објави пред точно два месеци, од денеска е и официјално. Имено нашиот некогашен прославен фудбалер и екс- репрезентативец на Македонија, Ацо Стојков е промовиран како нов спортски директор на Академија Пандев. Инаку Стојков веќе еден месец ја извршува оваа функција, но денеска “пандевци“ одлучија да го промовираат.
“„Навистина сум почестен со шансата што ми е дадена и сакам да се заблагодарам на Горан Пандев за тоа што ме препозна мене како човек кој може да допринесе многу во развојот на една нова модерна фудбалска приказна. Без да должам со детали, кои секако наскоро ќе и бидат презентирани на македонската јавност, само ќе кажам дека партнерството на Академија Пандев со италијанската Брера Холдинг допринесе дополнително да ја прифатам понудата за спортски директор, бидејќи се работи за еден визионерски проект, и план за издигнување на ниво погоре во работењето и организацијата на клубот во иднина. Во периодот кој следува етапно ќе ги презентираме и новите засилувања кои ќе бидат дел од нашиот пролетен тим. Целта е една, да излеземе од опасната зона и што порано да го обезбедиме опстанокот, а потоа мирно да го приведеме првенството при крај. Секако и максимално ќе се посветиме на изградба на структурата која ќе ја крене Академија Пандев на следно ниво.“ – изјави новиот спортски директор Аце Стојков.
