Вчера СПОРТМЕДИА го најави, а денеска Шкендија го потврди своето ново засилување во нападот, бугарскиот интернационалец Наско Милев. Тој е четвртото засилување оваа зима за тетовската екипа, а потпишана е соработка на 1,5 години со опција да биде продолжен договорот доколку двете страни се задоволни.
26-годишниот фудбалер, роден во Пловдив, доаѓа како слободен играч откако ги заврши обврските со литванскиот Панавежис. Инаку во кариерата играл за Ботев Пловдив четири сезони, потоа и за софиските Славија и Локомотив.
„Ова е еден од најдобрите балкански клубови и чест ми е што ќе играм за Шкендија. Клубот има фантастични навивачи, традиција, историја и високи цели. Дојдов да помогнам да ги оствари тие цели. Верувам дека со моите голови ќе помогнам да се освои титулата“, изјави Милев.