Кошаркарите на Денвер на гости го победија тимот на Њу Орлеанс со 99:98 и со тоа на домашната екипа и го нанесоа петтиот последователен пораз во НБА лигата. На почетокот на третата четвртина гостите водеа со плус 19 (66:47), а тимот на Њу Орлеанс поведе со 98:97 со слободни фрлања на 36,9 секунди до крајот на натпреварот. Сепак, во следниот напад, српскиот центар Никола Јокиќ го постигна кошот за победа на Денвер на 16,9 секунди до крајот на дуелот.
Откако пропушти два меча поради повреда на тетивата, Јокиќ оствари нов трипл-дабл со 25 поени, 11 скока и 10 асистенции. Во победничкиот тим 25 поени постигна и Џамал Мареј.
Во реприза на минатогодишното финале на Источната конференција, Мајами на свој терен го совлада Бостон со 98:95. Бостон водеше со 87:77 на почетокот на четвртата четвртина, но домашните се вратија со пресврт и успеаја да му се реваншираат на Бостон за поразот во источното финале (4:3). Бем Адебајо го предводеше Мајами до победата со 30 поени и 15 скока, додека кај гостите Џејсон Тејтум беше најдобар со 31 поен, 14 скока и седум асистенции.
Вашингтон на гости го совлада Далас со 127:126, а клучниот поен го постигна Кајл Кузма од линијата за слободни фрлања на пет секунди до крајот. Во последниот напад Далас не успеа да шутира кон кошот, по загубената топка на Лука Дончиќ.
НБА РЕЗУЛТАТИ:
Индијана – Чикаго 116:110
Мајами – Бостон 98:95
Њујорк – Кливленд 105:103
Њу Орлеанс – Денвер 98:99
Далас- Вашингтон 126:127
Феникс – Шарлот 128:97
