МЗТ Скопје денеска (18 часот) му гостува на Морнар во рамките на 18. коло во АБА-лигата. Актуелниот македонски првак ја брка првата гостинска победа, нешто што мора да се оствари доколку сака да остане во ова друштво. Вака размислува и стратегот Драган Николиќ, кој вели дека ќе влезат без еуфорија, но со голема самодоверба. Тој од своите момци ќе бара да го задржат нивото од претходната средба против Олимпија, тоа е единствениот пат до победата.
„Во Бар одиме со оптимам и зголемена самодоверба, но без еуфорија бидејки не ги заборавивме претходните лоши партии, особено на гостински терен. МЗТ Скопје е единствен без победа на теренот против некој од противниците и ако сакаме да се спротивставиме во АБА ова треба драстично да се промени, се разбира во наша корист. Со нетрпение го очекувам дуелот со тимот на Морнар и средбата со нашите големи спортски пријатели, браќата Ѓорѓе и Михаило Павичевиќ, кои стојат зад овој проект и кои прават многу за промоција на кошарката во Црна Гора. Очекувам добра игра од моите кошаркари, кои се надевам дека ќе го задржат квалитетот и нивото на енергија од натпреварот против Цедевита Олимпија. Ако го сторат тоа, тогаш имаме шанси да се радуваме по пресметката крај Јадранското море”, изјави Николиќ.
МЗТ Скопје е последен на табелата, има победа помалку од Морнар, победа ќе значи уште еден чекор напред кон опстанокот.
