Греам Потер сигурно не може да се потпре на статистиката во својата одбрана по лошите резултати кои ги ниже Челзи во серија. Англичанецот започна во Челзи најлошо од сите тренери кои го воделе клубот во последните 30 години.
Поразот од Борусија завчера го спушти Потер на дното на листата според процентот на остварени победи како менаџер на „сините“. Тој е на пат да стане полош и од досега најлошите како Глен Ходл кој го водеше тимот во раните 90-ти.
Во средината на октомври, Челзи го победи Милан со 2-0, и Потер беше пофален за успешните пет воведни натпревари на кормилото на лондончани: четири победи и едно реми изгледаа како многу силен резултат. Само Маурицио Сари, Карло Анчелоти и Гус Хидинк почнаа подобро во Челзи од него. Тухел стартуваше со истиот резултат, но забележително поскромно во учинок (кај Потер гол-разликата беше 11:2, со Томас 6:1).
Четири месеци подоцна бројките кажуваат нешто друго.
Потер е на чело на тимот веќе 24 натпревари, што му овозможува да се споредува со другите менаџери на Челзи на поизбалансиран начин. Потер има 9 победи со процент на освоени натпревари од само 38%. За четири месеци, Греам падна на последното место меѓу сите менаџери на клубот во ерата на Абрамович.
Дури и ако ги додадеме овде Клаудио Раниери (2000 – 2004), Џанлука Вијали (1998 – 2000) и Руд Гулит (1996 – 1998), тие исто така се подобри од Потер. Засега Потер е подобар само од Ходл кој почна со само 5 победи во првите 24 меча на клупата на „сините“.
