Македонскиот репрезентативец Дориан Бабунски ја продолжува извонредната голгетерска форма во дресот на Дебрецин. Со два нови погодока, тој денеска беше фактор за нова, осма сезонска победа на унгарскиот великан.
Дебрецин денеска со пресврт славеше на гостувањето кај лутиот ривал Хонвед со 3:2, а Бабунски ги постигна првите два гола за својот тим. Најпрво погоди за водство од 1:0 во 27. минута, а подоцна и за израмнување на 2:2 во 71. минута.
Со овие два нови гола, Дориан веќе стигна до бројката од 9 гола оваа сезона во унгарскиот шампионат што го донесе на 4. место на листата на најдобри стрелци во првенството.
