Одбојкарската федерација на Македонија аплицираше за организација на Балканското првенство во одбојка на песок за играчи до 22 години кое ќе се одржи оваа година. Од нашата куќа на одбојката потврдија дека апликацијата е испратена, но одлуката ќе биде донесена на собирот на Балканската одбојкарска асоцијација на 18 март во Истанбул.
„Со оглед на моменталната ситуација по земјотресот во Турција, се надеваме дека на 18 март ќе се одржи собирот на Балканската асосцијација во Истанбул. На тој состанок треба да бидат потврдени имињата на организаторите на балканските првенства во сите возрасни категории за оваа 2023 година. Ние како ОФМ конкуриравме за организатори на Балканското првенство во одбојка на песок во машка и женска конкуренција за играчи до 22 години. Искрено, оптимисти сме дека ќе ја добиеме организацијата и ќе подготвиме интересен настан во Штип“, вели генералниот секретар Зоран Карановиќ.
Во апликацијата на ОФМ, Штип е посочен како домаќин на настанот. ОФМ со градските власти во Штип подготвуваат одбојкарски спектакл на централниот плоштад каде ќе биде сместен и теренот за игра со трибини за посетителите.
