Алкалоид ја запиша првата победа во плеј-офот, откако на домашен терен ја оправда фаворитската улога против Пролет, го совлада со 27-21 и се искачи во горниот дел од табелата, поточно влезе во трката за третото место на табелата.
Младеновиќ и Серафимов постигнаа по пет гола кај домаќинот, додека кај Пролет Димковски и Анодновски имаа по четири погодоци.
Избраниците на Кирил Лазаров отворија со 4-1, противникот израмни на 4-4, а потоа Алкалоид со серија од 3-0 зголеми на три гола позитива 7-4. Најголемото водство изнесуваше четити гола, на одморот беше 14-11.
Пролет не успеа во второто полувреме да стори нешто повеќе, влезе во ритамот на Алкалоид и на крајот мораше да се помири со нов пораз.
Тиквеш пред своите фанови едноставно го совлада Охрид со 28-24 за втор триумф во плеј-офот. Иако оваа средба беше дерби на колото, сепак такво нешто не се случи, домаќинот не му даде шанса да помисли на победа.
По 3-4, со серија од 5-0, избраниците на Данило Брестовац дојде на плус четири 8-4, а потоа и поведоа со 13-8, позитива со која заминаа на одморот (14-9).
Не застанаа кавадарчани, набрзина со серија од 6-1 дојдоа на високи плус девет (20-11), разлика која беше доволна за втора победа во плеј-офот. Домаќинот застана на момент, на другата страна охриѓани со серија од 6-0 намалија на 24-21, но немаше драма. Тиквеш знаеше како да го приведе мечот.
Симиќ со седум гола беше лидер кај победникот, на другата страна ист број на погодоци имаше Бојаниќ.
