Победа на Македонија со 2:1 против Малта во првиот меч од квалификациите за ЕВРО 2024. Прв меч и веднаш победа и три планирани бода освоени. Добро е што со триумф стартувавме, тоа е најважно.
Не така добро прво полувреме, вториот дел беше далеку подобар, а се беше решено од 66. до 73.минута кога Елмас и Чурлинов погодија за 2:0, но Малта намали намали на 2:1 преку Јаник во финишот.
Ова е прва победа по пет натпревари пауза, прва победа од јуни минатата година.
И веднаш на стартот на мечот Малта со изненадување. Ако се очекуваше дека аутсајдерот ќе се брани со сите сили, сепак не беше така. Играта на Малта беше поставена нешто повисоко и тоа како да ги изненади нашите репрезентативци.
Сепак Македонија брзо ја презема иницијативата, ја пренесе играта на половината на гостите, но тоа беше јалово, без реална шанса, освен ако не се сметаат за заканите на Миовски во два наврати, потоа на Велковски со глава, исто и Трајковски се закани, но таа топка отиде над голот.
Во самиот финиш на првиот дел Малта двапати се закани, Сатариано шутираше, но само во ногата на Зајков, а потоа Камензули се обиде, но топката отиде покрај десниот дирек на Димитриевски.
Славо прво полувреме, очекувањата беа далеку поголеми. Македонија ја имаше иницијативата, го имаше и поседот, но недостигаше тој фамозен завршен пас за да се дојде до идеална шанса за гол па и за гол во мрежата на Малта.
Па така на пауза се замина со тие разочарувачки 0:0.
ПЕНАЛ! НЕ, СЕПАК ВАР ВЕЛИ ДЕКА НЕМА УДАР ОД БЕЛАТА ТОЧКА
Второто полувреме го почнавме со истиот состав од почеток на мечот, без Адеми кој поради повреда остана на клупата и се виде колку недостасува. И во првите минути исто како и во првиот дел, ништо не се смени. Македонија лајова, вака тешко дека ќе успеме да победиме. И кога се насетуваше некоја можност за шанса, или ние грешевме или гостите ја отстрануваа опасноста.
Селекторот Милевски реагира, ги внесе во игра Несторовски и Чурлинов во 58.минута. А само две минути подоцна беше покажан пенал за нас, но кусо траеше радоста. ВАР го поништи пеналот, Миовски симулирал фаул, па затоа немаше удар од белата точка. Претходно Елмас опасно шутираше, а голманот на гостите добро брани.
ЕЛМАААААС…..ГООООООЛ, И ЧУРЛИНОВ ЗА 2:0
И конечно гол, и конечно радост на трибините. Супер акција која започна Алиоски, Миовски спушти со глава до Елмас а овој мајсторски погодува за водство на Македонија од 1:0.
А, кој друг ако не Дијамантот. Браво Елиф.
И кога ќе тргне, тргнато е.
Барди до Чурлинов кој со лева откосо прекрасно шутираше во поблискиот агол и водство на Македонија од 2:0.
Браво Дарко.
По тоа водство од 2:0 Македонија како да умртви малку играта, Милевски не сакаше ништо да ризикува, и со право, до тие 2:0 тешко дојдовме.
Но Малта погодува и тоа преку Јаник за 2:1, по една мешаница пред нашиот гол, штета.
Тензично беше во финишот, селекторот Милевски доби црвен картон.
Квалификации за ЕВРО 2024, група-Ц
МАКЕДОНИЈА – МАЛТА 2:1 (0:0)
Арена “Тодор Проески“ во Скопје. Гледачи: 10.000. Судија: Кристо Тохвер (Естонија). Стрелци:Елмас 66., Чурлинов 73. (МАК)., Јаник 86. Ж. Картони: Барди, Алиоски, Миовски, Атанасов (МАК), Кристенсен, Теума, Борг (МАЛ). Ц. Картони: Благоја Милевски – селектор (МАК).
МАКЕДОНИЈА: Димитриевски, Зајков, Муслиу, Велковски (58.Чурлинов), Ристовски, Алиоски (80. Ашковски), Атанасов, Барди, Елмас, Трајковски (58. Несторовски), Миовски (80. М. Ристовски).
Селектор: Благоја Милевски.
МАЛТА: Бонело, Апап, Борг, Атард, Џ. Мбонг, Гуламиер, Кристенсен (78. Јаник), Камензули (78. Корбалан), Теума (85. Паибер), П. Мбонг (67. Димеш), Сатариано (84. Џонс).
Селектор: Микеле Марколини.
