Кошаркарите на Атланта и ЛА Лејкерс се изборија за место во плеј-офот откако синоќа славеа на воведните средби од плеј-ин турнирот за место во разигрувањето за титулата во најсилната кошаркарска лига. Атланта синоќа се пласираше во плеј-офот, откако на гости направи големо изненадување совладувајќи го Мајами со 116:105.
Веќе во првата четвртина Атланта стигна до двоцифрена предност, а во следната делница ги достигна максималните 63:39. До крајот на полувремето домашните го намалија резултатот на 65:50, додека третата четвртина ја започнаа со серија од 16:6 и стигнаа на минус пет. Атланта набрзо повторно стигна до двоцифрена разлика и подоцна без поголеми проблеми го доби плеј-ин дуелот.
Треј Јанг беше најефикасен со 25 поени, осум скока и седум асистенции во победата на Хокси, додека Дежонте Мареј постигна 18 поени. Српскиот кошаркар Богдан Богдановиќ постигна 14 поени за победничкиот тим. Во тимот на Мајами, Кајл Лоури беше најефикасен со 33 поени, Тајлер Хиро забележа 26 поени и шест скока, додека Џими Батлер запиша 21 поен и девет асистенции. Атланта во првото коло од плеј-офот ќе игра против Бостон, а Мајами ќе има уште една шанса за плеј-оф и тоа против победникот од пресметката меѓу Торонто и Чикаго.
Пласман во плеј-офот изборија и кошаркарите на Лос Анџелес Лејкерс кои по продолжение ја совладаа Минесота со 108:102. Во поголемиот дел од првото полувреме предноста беше на страната на Минесота, која на одмор замина со резултат 60:49. Првото водство Лејкерси во вториот дел од мечот на 1,4 секунди до крајот на четвртата четвртина, кога Денис Шрудер погоди тројка за 98:95. Гостите добија продолженија откако Мајк Конли на 0,1 секунда пред крајот погоди три слободни фрлања, откако беше фаулиран од Ентони Дејвис.
Победата на Лејкерси беше потврдена со слободните фрлања на Шрудер, кој постигна 18 поени во вториот дел и во продолжението. Лидер кај Лејкерси беше Леброн Џејмс со 30 поени, 10 скока и шест асистенции, а Ентони Дејвис имаше дабл-дабл со 24 поени и 15 скока.
Дабл-дабл учинок во гостинскиот тим забележа Карл-Ентони Таунс со 24 поени и 11 скока, а Мајк Конли додаде поен помалку. Лејкерси од седмото место во Западната конференција одат во плеј-офот каде ги чека екипата на Мемфис. Минесота во битката за осмото место ќе игра со победникот од пресметката меѓу Њу Орлеанс и Оклахома.
