Жоао Кансело синоќа беше единствениот фудбалер кој доби симфонија од свирежи на стадионот „Етихад“ во четвртфиналето од Лигата на шампионите меѓу Манчестер Сити и Баерн Минхен.
Кансело ги одигра последните десет минути од мечот, а доби бројни свирежи од трибините. Причината секако е што Пеп Гвардиола го испрати на позајмица во Баерн по расправијата што ја имаа на тренинг. Расправијата се случи на тренингот во пресрет на куп натпреварот против Арсенал, кога португалскиот ас дозна дека нема да биде стартер. Незадоволен од одлуката на Пеп, тој луто реагираше и се закани дека ќе си замине, по што Гвардиола му кажа дека е слободен да избере нов клуб, а „ветувањето“ го исполни неколку дена подоцна кога го испрати во Баерн.
Кансело, кој има договор со „граѓаните“ до летото 2027 година, има мали шанси следната сезона да се врати на „Етихад“ и затоа е поизвесно дека ќе биде продаден.
