Првиот човек на КФСМ, Перо Антиќ се најде во центарот на вниманието во српските медиуми. Не е тајна дека тој е навивач на Црвена Звезда, тим за кого настапуваше во својата кариера, а секоја можна шанса ја користи од лице место да ја поддржи. Својата љубов кон овој клуб, Антиќ се обидува да ја пренесе и на своите деца.
Тој за тамошните медиуми изјави дека ја гледа Звезда на тронот во АБА-лига.
„Звезда имаше шанси оваа сезона, се надевав дека ќе се пласира во Топ 8 во Евролигата, но важно е да покаже карактер до крајот на сезоната. Следува Јадранската лига и домашното првенство, а како и секогаш Звезда цели кон трофеи. Ја гледам Звездата на тронот. Да не звучи како клише, но Звезда има квалитет, Кампацо е во тимот и сите знаат колку му недостигаше. Полека се креваат. Покажаа карактер да играат натпревари кои не се важни“, изјави Антиќ.
Пред стартот на претпоследното коло во АБА-лига, Звезда е зад Партизан на минус три бода, но и меч помалку. Во Евролига игра денеска, на домашен терен го пречекува Фенербахче, во меч кој нема да смени ништо за место во Топ8.
