Тренерот на Реал Мадрид, Карло Анчелоти ја задржа ладнокрвноста и покрај пласманот на неговиот тим во полуфиналето на Лигата на шампионите. Италијанецот призна дека гостувањето во Лондон во никој случај не беше лесно.
„Знаевме дека треба да бидеме трпеливи. Противникот се обиде со се, ни правеше проблеми, особено на левата страна, но потоа ги направивме потребните прилагодувања и успешно контриравме. Во оваа фаза од сезоната колективно ни оди многу добро. Тимот е во форма, сите сме фокусирани и мотивирани. Куртоа направи многу важна одбрана и го спречи Челзи да поведе. Се надевам дека повредата на Алаба не е сериозна и тој брзо се опорави“, изјави Италијанецот.
„Да се стигне до полуфиналето е голем успех што ни овозможува да сонуваме за освојување на уште еден трофеј во Лигата на шампиони доколку стигнеме до финалето. Мислиме само на себе, но среќен сум и за Милан. Тимот одамна не бил во полуфиналето на Лигата на шампионите. Во исто време, тажен сум за Наполи, овој клуб ми е исто така многу драг“, додаде Анчелоти.
