Александра Војнеска-Зикова, актуелната претседателка на Атлетската федерација на Македонија е избрана за член на Европскиот атлетски совет. Со тоа Војнеска-Зикова е првата личнот од нашата земја која е избрана на оваа функција.
Назначувањето на Зикова е доказ за нејзините исклучителни лидерски способности и посветеност во промовирањето на атлетиката во Македонија и надвор од неа. Под нејзино раководство, Атлетската федерација на Македонија постигна значаен напредок во развојот на спортот и негувањето на младите таленти.
Зикова изрази благодарност и ја истакна својата посветеност да работи во насока на подобрување на атлетиката во Европа.
„Почестена сум што сум избрана за оваа важна улога и со нетрпение очекувам да работам со моите колеги за промовирање на атлетиката и создавање на поинклузивен и разновиден спорт“, рече таа.
Изборот на Александра Војнеска-Зикова се случи на 28-от Европски атлетски конгрес кој викендов се одржа во Белград, Србија. Добромир Карамаринов од Бугарија беше реизбран за претседател на Европската атлетика во следните четири години од 2023 до 2027 година. Се избраа и тројца потпретседатели: Чери Александар од Велика Британија, Жан Грација од Франција и Карин Груте Мовин од Шведска.
Покрај Зикова, во Советот на европската атлетика беа избрани следните членови: Слободан Бранковиќ-Србија, Франк Карерас-Гибралтар, Раул Чападо-Шпанија, Ен Фарсет-Норвешка, Мартон Ѓулаи-Унгарија, Тиа Хелебаут-Белгија, Ана Кирнова-Словачка, Јирген Кесинг-Германија, Стефано Меи-Италија, Гванца Микеладзе-Грузија, Анти Филаковски-Финска, Ерих Теигамаги-Естонија.
Советот за четиригодишниот период од 2023-2027 година ќе го комплетира претседателката на Комитетот на спортисти Леа Спрунгер од Швајцарија, додека извршниот директор на европската атлетика Кристијан Милц и претседателот на Светската атлетика, Себастијан Коу се членови по службена должност.
