Попладнево од 16 часот на програмата се сите пет натпревари од 29.коло во тековната сезона во ПМФЛ. Откако викендов беше слободен, лидерот на свој терен го дочекува Тиквеш. Струга ТЛ мора, ама баш мора да дојде до трите бода ако се знае дека сега има само +3 во однос на Шкендија.
Стружани се одморни, со верба во себе, знаат што е потребно да дојдат до бодовите денеска против Тиквеш.
Младиот Абдулхади Јахја, во пресрет на денешниот меч со кавадарчани истакнува:
“Атмосферата во тимот е одлична, да, јасно е дека пред нас е тежок натпревар, го респектираме Тиквеш, но ветуваме дека ќе дадеме се од себе бодовите да останат во Струга. Влегуваме во фаза на првенството кога сега секој меч е екстра важен, кога за нас секој меч е како финале. Јас се надевам и очекувам дека до крајот на сите ќе славиме и ќе задржиме првото место и со тоа ќе ја донесема титулата во нашиот град“ заврши Јахја.
На ФФМ се игра скопското дерби меѓу Македонија ЃП и Скопје. “Пиратите“ сеуште се надеваат дека може да го избегнат тоа 10.место кое води во баражот, па затоа и денеска ќе одиграат на победа.
Брегалница гостува на Чаир, каде се среќава со Шкупи. По поразот дома од Шкендија изминатиот викенд, шансите за пласман на тоа 4.место кое можеби ќе води во Европа се намалија,сега теоријата е во игра. Чаирчани пак како да се откажаа од битката за титулата, но Шкупи е Шкупи.
Во Струмица домашната А. Пандев не би требало да има проблеми со Победа, се разбира ако одигра како што тревба и како што знае.
Под Шара гостува Силекс, кратовци сакаат да и ги поматат сметките на Шкендија во битката за титулата. Од друга страна четата на Ќатип Османи едноставно е безмилосна кон своите ривали, денеска сака седум од седум, седма победа во серија.
Работнички во ова коло е слободен.
ДВОЈКИ ЗА 29.КОЛО – ДЕНЕСКА (16 Ч)
Македонија ЃП – Скопје
А. Пандев – Победа
Струга ТЛ – Тиквеш
Шкупи – Брегалница
Шкендија – Силекс
Работнички (слободен)
ТАБЕЛА: Струга ТЛ 53, Шкендија 50, Шкупи 46, Силекс 43, Брегалница 37, Македонија ЃП 33, Тиквеш 31, Работнички 31, А. Пандев 23, Скопје 19, Победа 13 бодови
