Екипата на Барселона се пласира во финалето на женската Лига на шампиони откако во двомечот во полуфиналето го исфрли Челзи. На првиот меч во Лондон, каталонскиот тим победи со 1:0, а денеска на реваншот на „Ноу Камп“ беше 1:1.
Па така Барселона трет пат по ред ќе игра за европската титула. Во 2021 година ја освои титулата по триумфот над Челзи во финалето, а во 2022 година беше поразена од Лион.
Севкупно Барселона има четири финалиња, во првото, во 2019 година беше поразена од Лион.
Инаку противник на Барселона во големото финале кое ќе се игра на „Филипс“ стадионот во Ајндховен на 3 јуни ќе биде подобриот од мечот меѓу Волфсбург и Арсенал. Првиот меч во Германија заврши 2:2, а реваншот во Лондон е на 1 мај.
