Пишува: Зоран Ѓоршоски
Она што се знаеше уште во јануари – февруари, во екот на зимскиот преоден рок, од вчера е и официјално. Победа испадна од нашата елитна лига а со тоа и Прилеп, нели нашиот “најфудбалски град“, остана без Прва лига. И сега Победа ќе “дреме“ во ВМФЛ во очекување на некои поубави времиња.
А таму следната сезона во таа ВМФЛ ќе играат Победа, Пелистер, можеби Вардар, некогаш гиганти на мак-фудбалот. Замислете во следната сезона во ПМФЛ ќе нема клубови од Прилеп, Битола, Велес, Куманово. Охрид и Гостивар веројатно ќе си добијат.
И, сега? Кој е виновен за тоа што и се случи на толку “саканата“ од прилепчани, Победа?
Двократен шампион на Македонија, освојувач на Купот, клубот кој ја донесе една Парма во Македонија кога тој италијански клуб беше еден од најдобрите 5-6 клубови во Европа во тој момент, сега тој клуб, сега таа Победа ќе игра во една Втора лига.
По поразот од Скопје вчера со 0:4, и дефинитивно, Победа испадна во Втора лига.
Штета за фудбалот во Македонија?
И како ли ќе личи следната сезона ПМФЛ без една Победа, Пелистер, можеби Вардар.
Видете, не се виновни клубовите, оние со строго приватен капитал што ќе играат и играат во ПМФЛ. Тие си имаат проект, си даваат и вложуваат пари.
За Победа, како тоа бре ниту еден бизнисмен во градот под Марков Кули, а ги има барем десет и тоа какви, не најде за сходно да го купи клубот и да ги вивне таму каде што му е местото, при врвот во мак – фудбалот.
Победа има се што треба. Историја, фанови, голема посета, но нема само едно, а тоа се – пари.
И затоа ќе биде таму кај што ќе биде.
Уште еднаш, Прилеп, Велес, Битола, Куманово…без ПМФЛ.
Запрепастувачки…
А што се однесува до останатите мечеви од 30.коло, Струга ТЛ со стил мина низ Штип и сега е на чекор до својата историска титула, Шкупи славеше во Кратово кај Силекс, Шкендија и се одмазди на Македонија ЃП за елиминацијата во Купот а Работнички во Кавадарци покажа дека во моментов е многу, многу подобар тим од Тиквеш.
