Еден од најдобрите кошаркари во Европа, Алексеј Швед, заврши во болница после напад на хулигани во Москва. Тоа го соопшти и неговиот клуб ЦСКА, кој беше доминантен во првиот дел од сезоната во ВТБ лигата, а потоа испадна во плеј-офот од Локомотива Кубањ.
Токму елиминацијата на трофејниот клуб е причината за нападот на Швед, кој потполно потфрли во полуфиналната серија. Засега не се откриени хулиганите, но руските медиуми на големо шпекулираат дека најдобриот стрелец на Евробаскетот 2017 е жртва на елиминацијата на ЦСКА.
Швед имал повреди на главата во нападот пред еден ресторан, а од таму е однесен во болница но е во стабилна состојба и веќе дал изјава на полицијата.
Алексеј до декември ќе наполни 35 години, а играше за многу клубови меѓу кои и за оние од НБА, Минесота, Филаделфија, Хјустон и Њујорк, а шест сезони помина во Химки, па се врати во ЦСКА каде што и ја почна кариерата.
