Италијанскиот фудбалски сојуз денеска отвори интерна истрага за случувањата по вчерашниот меч од Серија А меѓу екипите на Специја и Милан. Имено, по мечот е забележано дека некои од челниците на навивачките групи на Милан кои беа на стадионот на Специја со повишен глас и закани им се упатија на „построените“ фудбалери на „росонерите“.
Сега здружението сака да утврди дали се работело за конкретни закани или само „прекорување“ пред мечот со Интер во Лигата на шампионите. Од Федерацијата и нивните дисциплински тела најавија дека детално ќе се прегладаат снимките од стадионот пред да се донесе одлука.
Доколку се утврди дека навивачите им се заканувале на своите играчи, полицијата може да поведе постапка против нив, а клубот ќе биде казнет.
