По вчерашниот срамен испад на еден од полицајците кои беа во салата „Билјанини Извори“ за време на финалето на ракометниот куп на Македонија меѓу Вардар и Е. Пелистер, кога со палка го удри ракометниот репрезентативец на Македонија, Филип Талески, денеска се огласија од МВР.
Во соопштението објавено во јавноста се вели:
„Одделот за внатрешна контрола, криминалистички истраги и професионални стандарди при МВР оформи предмет во врска со случувањата на финалето на КУП на Македонија. По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица.
По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот“.
Останува да видиме каква ќе биде одлуката и мерките кои МВР ќе го преземе кон своите службеници по овој шокантен потег на униформиран полицаец.
