Попладне на тренинг центарот “Петар Милошевски“ во Скопје, со почеток од 17 часот, се игра јубилејното 30.финале во Купот на Македонија. Во него се среќаваат Македонија ЃП и Струга Трим Лум.Тоа ќе биде дуел на актуелниот бранител на купот и новиот шампион на ПМФЛ.
Ова ќе биде фудбалски празник, се среќаваат две квалитетни екипи. Македонија ЃП оди по третиот трофеј, а Струга ТЛ оди по историја. Имено покрај пехарот во првенството овој клуб, кој постои само осум години, сака и пехар во најмасовното спорстко натпреварување во Македонија.
Факт е дека клубот од Ѓорче е во предност, ова за нив ќе биде петто финале од кое трето во последните пет години или четири ако се знае дека поради Ковид-19 во 2020 не се играше финалето.
Од друга страна ова финале ќе биде прво, дебитанстко за стружани кои не кријат дека и тоа како сакаат оваа еуфорија кај нив да ја искористат и да освојат уште еден пехар и со тоа оваа 2022/23 сезона да ја направат историска.
Македонија ЃП е единствената екипа која шампионот не успеа да ја победи во штотуку завршеното првенство, во тие три меча немаше победник,трипати се играше нерешено. Исто така “лавовите“ и по традиција не им одговараат на стружани. Досега овие две екипи одиграле 16 натпревари, на кои шест победи има Македонија ЃП, има шест ремија и само четири победи на Струга ТЛ.
Така да кога играат овие две екипи нема фаворити, без разлика што Струга ТЛ е во подобра форма во моменто, но затоа Македонија ЃП веќе еден месец специјално се подготвува за ова финале.
Се очекува ова да биде вистиснско и големо финале, дуел за уживање, фудбалски празник.
Така е кога еден против друг ќе се најдат Мишевски, Стевковски, Воша, Фазли, Стојковски…на чело со стратегот Горан Симов, на едната страна, а на другата Ибраими, Шабани, Радиќ, Радески, Ќосевски…предводени од искусниот стратег Шпетим Дуро.
Па, ајде да уживаме во ова големо и јубилејно 30.финале во Купот на Македонија.
