Репрезентацијата на Хрватска се пласираше во финалето на Лигата на нации откако во Ротердам ја совлада Холандија со 4:2 по продолженијата. „Коцкестите“ имаа водство од 2:1 се до 96. Минута во регуларниот дел од мечот, но „лалињата“ успеаја да израмнат и да обезбедат дополнителни 30 минути.
Холандија прва поведе со голот на Мален во 32. минута, резултат со кој се замина на пауза. На почетокот на вториот дел Хрватска веднаш возврати. Пенал за „коцкестите“ кој во 55. минута Андреј Крамариќ го претвори во израмнување за 1:1.
Пашалиќ им донесе предност на Хрватите во 73. минута и најави големо славје за гостите, но во последните секунди од мечот „лалињата“ преку Ноа Ланг успеаја среќно да се избрат за 2:2 и продолженија.
Во дополнителните минути Хрватска одигра одлично, а поведе во 98. минута по одличниот погодок на Бруно Петковиќ од околу 20 метри. Конечните 4:2 за Хрватска ги постави Модриќ со гол од пенал во 117. минута.
Избраниците на Златко Далиќ во финалето го чекаат подобриот од дуелот меѓу Шпанија и Италија.
