Еден од најдобрите африкански фудбалери на сите времиња, Самуел Ето, кој е претседател на Камерунската фудбалска асоцијација, според порталот Камфут, е вмешан во местење на натпревари. Споменатиот медиум наводно поседува аудио снимки кои го компромитираат Ето и го обвинуваат за злоупотреба на позицијата прв човек на камерунскиот фудбал.
Камфут пишува дека на објавените снимки јасно се слуша како победникот во Лигата на шампионите со Барселона и Интер разговара со Валентино Фвејн, претседателот на Викторија Јунајтед, тимот кој минатата сезона се пласираше во првата камерунска лига. Разговорот датира од почетокот на годината, а сопственикот на Викторије му се пожалил на славниот напаѓач дека мисли дека судиите го крадат неговиот клуб и дека поради ова нема да може да избори влез во елитната класа.
„Смирете се, ќе ви дадеме три бода и ќе предложам судии, ве уверувам. Уште не сум дома, излезен сум брат. Немав време ниту да разговарам со претседателот на судиската комисија. Сега не можам директно да ги повикам судиите, но можам да го повикам претседателот. Има работи што можеме да ги направиме, но мора да бидеш многу дискретен, брат”, наводно рекол Ето. На крајот споменатиот клуб избори пласман во првата лига, а Камфут го напаѓа Ето:
„Ето вети дека ќе му ја врати славата на камерунскиот фудбал, но сега е во центарот на местењето натпревари“.
