Македонската одбојкарска репрезентација од денеска почнува со првите контроли на формата во пресрет на Европското првенство кое кон крајот на месецот почнува во Скопје. По 20-тина дена интензивни подготовки, избраниците на селекторот Јошко Миленкоски денеска ќе го имаат првиот контролен тест против репрезентацијата на Романија на дуел од затворен карактер.
Веќе за утре (19 ч.) е закажан и официјален пријателски натпревар во СЦ Јане Сандански со Романците, на кои и навивачите ќе имаат можност да сведочат на текот на подготовките и формата во која се наоѓа нашиот национален тим.
Иако беа планирани три теста со Романија, ќе се одиграат два дуели, по кои ќе следуваат и најавените проверки на формата против селекциите на Јапонија и Израел закажани во салата Јасмин во Кавадарци, каде нашата селекција ќе замине од 9 август.
