Младиот македонски одбојкарски репрезентативец Лука Костиќ во новата сезона ќе го носи дресот на српскиот прволигаш Рибница од Краљево. Клубот оваа недела го потврди трансферот на нашиот примач, кој ќе им се приклучи на новите соиграчи по репрезентативните обврски со Македонија.
„Со Рибница склучив договор на една година и се најдевам дека ова ќе биде клуб во кој ќе можам играчки да напредувам. Ова е одлична можност за мене да се натпреварувам и да тренирам на повисоко ниво. Во Србија очекувам да стекнам поголемо искуство, затоа што клубот минатата сезона беше меѓу најдобрите четири екипи во првенството, а оваа сезона се надевам дека ќе нападнеме и на некоја од погорните позиции“, вели Костиќ за трансферот во новиот клуб.
Тој минатата сезона го носеше дресот на велешки Борец, а во моментов е дел од селекцијата на Македонија која се подготвува за настапот на следното Европско првенство.
„Очекувам добра соработка со новите соиграчи и стручниот штаб во Рибница. Секако заеднички ќе ги постигнеме зацртаните цели. Заминувам за Краљево по завршувањето на репрезентативните обврски. Во моментов фокусиран сум на нашата репрезентација и сето она што не очекува на Европското првенство“, дополнува нашиот млад одбојкар.
