Алкалоид со победа го отвори меѓународниот турнир во Струга, откако славеше против Динамо Панчево со 27-23.
Македонскиот вицепрвак отвори со 3-1, водство кое го имаше во поголем дел од мечот. На другата страна Динамо во овој дел успеа само да изедначи, а по последните 8-8, избраниците на Кирил Лазаров со три гола во низа (Симоноски, Џонов и Митев) поведоа со 11-8 во 27 минута. Алкалоид не искористи напад за плус четири. На одморот резултатот беше 12-9, во добро светло се покажа Ромеро, кој имаше шест интервенции.
Македонскиот вицепрвак по само пет минути игра во второто полувреме дојде на плус пет (15-10), оваа позитива ја имаше и во голем дел. По серијата на Динамо од 3-0 за 16-13, Алкалоид врати за нови плус пет 18-13 пред средината на овој период.
Ракометарите во 49 минута успеаја да доближат на 20-18, па Лазаров направи промена на мрежата, влезе Трајковски на местото на Ромеро. Искусниот голман внесе свежина, а неговиот тим одржуваше позитива од два до три гола.
Кристијан Симоноски постигна шест гола (пет од пенал), Мартин Серафимов запиша четири. Кај гостите голманот Ќировиќ имаше 12 интервенции.
