МЗТ Скопје и официјално стартуваше со подготовките за новата сезона. Тренерот Васко Атанасов и неговите помошници првпат на располагање ги имаат сите кошаркари на кои сметаат за претстојниот период во кој ќе ја бранат двојната круна и ќе атакуваат на враќање во јадранската елита.
Последните на тимот му се приклучија Американците Ијасу Ворку и Седрик Расел, нешто претходно во Скопје пристигнаа и Србинот Душан Танасковиќ и Хрватот Марко Баковиќ, а на тренинзите им се приклучија и репрезентативците на Македонија, кои добија неколку дена повеќе за одмор поради обврските кон националната селекција.
Кошаркарите на македонскиот првак подготвителниот период ќе го минат во Скопје, а првата контролна средба е закажана за на 5 септември кога ќе му гостува на грчки Арис. Потоа на домашен терен ќе ги пречека екипите на Пеја (8 септември), Гостивар (14 септември) и на Рилски спортист (18 и 19 септември).
Првиот официјален натпревар, МЗТ Скопје ќе го одигра на 23 септември и тоа во македонскиот Суперкуп против Феникс.
