Екипата на ПСВ се пласира во групната фаза на Лигата на шампионите откако го елиминира Ренџерс во двомечот од плеј-офот. Резултатот во Глазгов беше 2:2, а вечерва на свој стадион ПСВ славеше со 5:1.
Па така гигантот од Ајндховен ќе игра во групната фаза од ЛШ за првпат по сезоната 2018/19.
А дебитант во групната фаза од ЛШ ќе биде белгиски Антверп кој го исфрли АЕК од Атина. Првиот меч Белгијците го добија со 1:0, а вечерва во Атина славеа со 2:1. Поведе Антверп со голот на Керк во 73 минута, изедначи Араухо во 90 минута. Пет минути подоцна Беликвиша ја запечати победата на Антверп.
Последниот патник во групите е дански Копенхаген. Вечерва „лавовите“ одиграа 1:1 против полскиот првак Раков, а благодарение на победа од 1:0 на првиот меч отидоа во наредната фаза.
