Вардар 1961 достојно се збогува со европската сцена. На реванш мечот против Рајн Некар за пласман во групната фаза во Европската лига, избраниците на Владо Недановски беа поразени со 37-33 (17-17).
Лазарески повторно блескаше, запиша седум гола, зад него со еден помалку беа Јагуриноски и Петриќ.
Македонскиот тим пружи силен отпор на реванш мечот против бундес-лигашот. Иако беше јасно дека Рајн Некар ќе оди во групната фаза во Европската лига, сепак „црвено-црните“ на гостински терен одиграа храбро и борбено, како да е прва средба.
Вардар 1961 во првото полувреме имаше водство од 5-7 и 6-8, по што противникот со серија од 4-2 дојде до прва поголема предност (10-8). Нешто подоцна беше и 15-11. Овој налет не ги демотивира момците на Владо Недановски, напротив се издигнаа и со серија од 2-6 на одморот изедначија на 17-17.
Веќе на стартот на првото полувреме, Вардар 1961 повторно поведе (17-18), но Рајн Некар постојано одржуваше минимална позитива од еден до два гола, која на стартот на 50 минута повторно беше плус три (30-27). Полека се „кршеше“ мечот, РНЛ притисна малку повеќе и без проблем го приведе и овој дуел во своја корист.
