Големиот фаворит во групата „Ц“ во Скопје на Европското одбојкарско првенство, Полска, вчера бја оствари и третата победа во групата, овој пат во дуел со нашата репрезентација. Полјаците покажаа слабости само во вториот сет, кога сериозно можевме дури и да се вмешаме во освојување на сетот, но квалитетот кој го има оваа селекција распореден на секоја позиција во тимот на крајот им донесе уште еден убедлив триумф.
Селекторот на Полска, прославениот српски одбојкарски ас, Никола Грбиќ, по мечот токму го издвои вториот сет од мечот како еден од најважните на кои неговите играчи мора да работат и во иднина.
„Ова беше многу важен натпревар за нас. Не може да се победува со стоење на терен. Мора да се заработи секој поен. Се виде тоа во вториот сет. Малку потфрливме, направивме грешка повеќе и веднаш противникот се врати. Мораме секогаш да имаме сериозен пристап во мечот, без разлика кој е на терен. Добро е што момците добро го сфатија тоа и одработија добар меч. Така ќе продолжиме и на следните две средби. Без разлика дали тоа се најслабите противници во групата, ќе бидеме сериозни само заради нас. Не смееме да губиме. Доаѓа осминафинале, таму една грешка значи дека ќе мора да се вратиме дома“, вели полскиот стратег.
За Грбиќ, Македонија игра добра одбојка. Тоа го покажа и против нив. За двата последни меча на избраниците на Миленкоски вели дека шанса за трета победа треба да гледаме во Чешка.
„Имате шанси со Чешка, искрено. Холандија има неколку играчи кои се искусни, а во коректорот имаат човек кој само решава натпревари. Против Чешка имате шанси. Знаат да играат добро, но во првите два дена покажаа дека играат слабости, особено на оној меч со Данска. Со помош на публиката имате реални шанси да ги победите“, порача Грбиќ.
Македонија утре од 17 часот го игра четвртиот меч во групата. Противник е Холандија, додека Полјаците утре по четврта победа одат против Данска.
