Македонската репрезентација до 21. година вече втор ден се подготвува за стартот на квалификациите за претстојниот Европски шампионат. Авантурата ја стартуваме на гостински терен против селекцијата на Шведска на 8 септември на дуелот во Јонкопинг кој се игра од 18:00 часот, а три дена подоцна ни гостува Холандија во Скопје.
Нашиот капитен Марио Илиевски смета дека оваа генерација има капацитет и квалитет да се справи со предизвикот и да донесе уште еден голем успех што се однесува до младинскиот фудбал.
„Секако дека сум убеден во квалитетот и капацитетот на оваа генерација. И тоа како сум убеден дека имаме потенцијал да се надигруваме со сите и да освојуваме бодови кои би не однеле до евентуален успех во овие квалификации. Работиме добро, учиме, се подобруваме. Одигравме серија на подготвителни мечеви од кои извлековме поуки и кои што не научија каде грешиме. Атмосферата во тимот е одлична и сакаме со позитивен резултат да ги отвориме квалификациите. Шведска е анализирана, тоа е тим кој што има квалитети, но и мани кои планираме да ги искористиме“ – изјави капитенот на У21 репрезентацијата на Македонија, Марио Илиевски.
