Историското Европско првенство за Македонија денеска завршува, но само во Скопје. Избраниците на селекторот Јошко Миленкоски уште во првите два меча со победите над Данска и Црна Гора го исполнија планот, пат во осминафинале, па по поразите од Полска и Холандија, сега остана само да се обидат да го надминат „просекот“ од две победи на ЕП и да дојдат до трет успех, кој ќе значи и најдобар пласман на нашиот одбојкарски тим во групна фаза на едно континентално првенство.
Последниот ривал Чешка е репрезентација со подобар ЦЕВ рејтинг, состав од квалитетни одбојкари кои ќе ја задржат улогата на фаворити на денешниот меч. И тие како и ние, ја посакуваат таа трета победа за да ја избегнат Италија во осминафиналето, па директната пресметка вечерва во „Борис Трајковски“ ќе одлучува за конечните позиции на табелата. Миленкоски и момците се свесни за новиот предизвик, но јасно е дека плановите не излегоа како што очекувавме, по вчерашната повреда на капитенот Никола Ѓорѓиев кој не настапи на дуелот со Холандија, а голем знак прашалник е и неговиот настап против Чешка.
Со Никола во тимот, Македонија е друга селекција. Тоа му е јасно на секого кој ја следи одбојката барем малку. Оттука денеска ќе биде исклучително важно да почекаме до стартот на мечот и да видиме дали Ѓорѓиев ќе има сили за настап. Но, и доколку тој не е во првиот состав, останатите наши одбојкари јасно ставија дознаење дека ќе се борат за секој поен во секој сет и со помош на публиката ќе се обидат да дојдат до победа за трето место.
Против Чесите досега имаме четири меѓусебни пресметки и сите четири сме ги загубиле. Имаме освоено само еден сет, што е знак за нивна тотална доминација во меѓусебните дуели, но со оглед на нашиот терен и мотивацијата која ја имаме како за крај на групата, да се надеваме дека денеска ќе направиме „сефте“.
Дуелот почнува од 20 часот во СЦ „Борис Трајковски“, а како предигра на оваа пресметка од 17 часот следува и дуелот меѓу Полска и Црна Гора. Судии на мечот меѓу Македонија и Чешка ќе бидат Фереира од Португалија и Шикањиќ од Лихтенштајн.
