Попладнево на Градскиот стадион во Тетово се одигра заостанатиот меч од 2.коло меѓу Шкендија и Струга ТЛ. Со голот на Аганспахиќ во 47.минута тетовци го победија шампиoнот со 1:0 и сега се лидери на табелата, со два бода повеќе од вториот Шкупи.
Добра игра на тетовци, посебно во првиот дел, па може да се каже дека и заслужено победија на овој натпревар.
Во првите 15 минути од средбата како да се испитуваа силите, гостите преку Укпаод далечина се заканија, но тоа беше далеку од гол. Шкендија врати во 15.минута со прекрасен шут на Тотре од 25 метри, но Ќосевски со фантастична парада одбрани и ја исфрли топката во корнер. По нафрлувањето од корнер Адили со глава се закани, но за малку покрај голот. Во 20.минута Радески шутираше но домашниот голман Талески брани.
Пет минуту подоцна Дита излегува сам пред Ќосевски, но го погодува десниот дирек. Во истиот напад Тотре пак шутира, а Ќосевски пак брани. Две минути подоцна Красниќи шутира со глава, но и сега Ќосевски брани. Во последната минута од првиотден Струга ТЛ се закани преку Незири, но нема гол, на пауза се замина со тие 0:0.
И конечно гол на супер – дербито, и тоа во првата минута од второто полувреме. Чинари нафрли од корнер а Аганспахиќ со убав шут со глава ја тресе мрежата на Ќосевски за 1:0 за Шкендија.
По примениот гол Струга ТЛ се отвори, почна да комбинира, да игра, со желба да дојде до шанса за израмнување. И таа дојде во 60.минута, но Талески остана несовладан за жал на стружани.
Гостите до самиот крај не се предаваа, инсистираа на напад, имаа и закани,како онаа на Шабани, но сепак на крајот мораа да го признаат поразот.
Откако го одигра и овој заостанат меч, на Струга ТЛ и останува уште еден да одигра, оној против Вардар и тоа во ноември.
Инаку денешниот меч за Бруно Дита беше бр.100 во дресот на Шкендија, па затоа доби подарок од страна на директорот Ардијан Цуцули, и тоа специјален дрес.
ТАБЕЛА
Шкендија 20, Шкупи 18, Силекс 16, Струга ТЛ (-1) 15, Брера 14, Тиквеш 13, Работнички 13, Македонија ЃП 13, Брегалница 10, Воска 7, Гостивар 7, Вардар (-1) 5 бода…
