Австралискиот тенисер Ник Кирјиос е отстранет од АТП ранг листата по повеќе од четири месеци неактивност на турнирите.
Повредите го мачеа цела сезона, поради што го пропушти Австралија опен, а потоа претрпе пораз во првото коло на турнирот на трева во Штутгарт. Тоа беше неговиот единствен натпревар оваа година.
Повредата на зглобот го принуди на долга пауза, завршувајќи на 472-то место на АТП рангирањето минатиот месец.
Кирјиос последен пат победи во 2022 година на Отвореното првенство на Јапонија, каде стигна до четвртфиналето. Освоените бодови на тој турнир сега се избришани и тој остана без место на АТП рангирањето.
Тој неодамна објави дека почнал да тренира, па неговото враќање се очекува следната година.
Да потсетиме, 28-годишниот Кирјиос на почетокот на годината беше во Топ 20 тенисери во светот, а најдобар пласман во кариерата му е 13. место. Минатата година играше во финалето на Вимблдон, што е најголем успех во неговата кариера.
