Откако ангажманот на Матео Ретегуи се покажа како успешен експеримент во италијанскиот национален тим, селекторот Лучано Спалети се обиде повторно со иста формула – да натурализира уште еден аргентински фудбалер, овојпат Матијас Суле.
20-годишниот фудбалер на Јувентус, кој игра како позајмен во Фросиноне, го привлече вниманието на италијанскиот селектор. Но Суле за разлика од Ретегуи одби, а ќе чека повик од Аргентина.
„Зборував со Спалети и му ја кажав вистината. Се чувствувам Аргентинец и ќе играм за Аргентина. Му се заблагодарив што го забележа мојот потенцијал, сепак, ќе ја чекам Аргентина. Не знам кога ќе биде тоа, порано или подоцна, ќе почекам. Таму сум роден и моето срце секогаш вели Аргентина“, изјави Суле за „Спорт Медиасет“.
За Фросиноне младиот фудбалер постигна пет гола и запиша една асистенција во осум натпревари во Серија А.