Под ИТНО да се стави крај на криминалните судиски одлуки ширум терените во Македонија каде секој викенд или секое коло сме сведоци на лакрдии, изживувања и скандалозни одлуки на штета на фудбалот.
Светот веќе со години воведе ВАР технологија која за нас е сон поради финаниската немоќ. Хаосот во домашниот фудбал кулминираше викендов каде речиси на сите прволигашки средби имаше еден куп спорни моменти, голови, пенали, црвени картони…
Да не комплицираме многу и да бидеме директни. Ако сите ние ги гледаме грешките на судиите во ист момент кога се направени преку платформата на ФФМ и продукцијата која врши пренос од натпреварите, тогаш зошто официјалните лица не ја користат таа платформа, тие камери за да ги гледаат спорните моменти. Лекот е еден судија повеќе кој би ја гледал средбата на лап-топ на стадионот, со делегатот, контролорот… И така сите тие се официјални лица кои после секој натпревар истиот го добиваат на „стик“ а потоа ги гледаат спорните моменти.
Ако се сака се се може!!! Секој натпревар се пренесува со три камери кои се доволни да се процени некој спорен момент. И така се камерите на стадионите и истите треба и мора да се користат за анализа на спорните моменти се со цел да се избегнат криминалните одлуки кои прават хаос, тензии, нервози и обиди за физички пресметки.
Судиската организација под итно треба да го изгаси пожарот и да почне со работа, затоа што анализите кои се прават после секој натпревар не носат никакво подобрување на арбитражата. Во сите земји на Балканот, освен кај нас и во Црна Гора, има ВАР технологија, и затоа користете ги камерите за да ги спасите судиите од лакрдиите.
И притисокот кај судиите би се намалил ако се знае дека има контрола на спорните моменти, ако се гледа снимка… Нешто слично како во кошарката каде судиите за спорните моменти одат и гледаат видео снимка на записничката маса. Не е само во таксите судиски, контролорски, делегатски…!!!
Работете нешто, нешто за добро на сите и на самите судии додека не настане уште поголем циркус.
