Македонската фудбалска репрезентација денеска и официјално стартува со мини-подготовките за квалификациските дуели против Италија и Англија за пласман на ЕП 2024 година.
Благоја Милевски и неговите избраниците се пред нова тешка задача, играат против Италија (17. ноември) во Рим и против Англија во Скопје (20. ноември).
Чуварот на мрежата на националниот тим, Столе Димитриевски кој е во одлична форма, очекува максимална игра и на двете средби.
„Имаме два тешки натпревари, но ќе го дадеме нашиот максимум како и секогаш. И на двете средби против Италија и против Англија треба да уживаме, и да видиме до каде се нашите сили против вакви противнции.
Добро знаеме која е Италија, имаме добри резултати во последните натпревари, па затоа очекувам и се надевам дека ќе го дадеме максимумот и ќе дојдеме до позитивен резултат“, вели искусниот голман.
Македонија против Англија на првата средба на гостински терен беше убедливо совладана со 7-0.
„Првиот меч против Англија беше нереална слика за нас и за нашите можности. Навистина беше тешко да се биде компететивен. Сега имаме нова шанса да се покажеме во вистинско светло“.
Македонија по шест одиграни кола има скор од две победи, реми и три порази, се наоѓа на четвртото место на табелата во групата Ц зад Италија, која има десет бода, три повеќе од „црвено-жолтите“.
