Алкалоид денеска (18:45 часот) го игра последниот гостински меч во рамките на Европската лига, претпоследен во рамките на групната фаза. Противникот на македонскиот вицепрвак е Војводина, тим кој има докажани и далеку поискусни имиња од составот предводен од Кирил Лазаров.
Предводникот на Алкалоид потенцира дека мечот го чекаат подготвени, бара мотивираност и борбеност од неговите ракометари.
„Војводина е сериозен противник со докажани играчи на европската сцена и квалитетен ростер. Тие се екипа која лани освоија европски пехар, а имаат големи амбиции и сезонава и во иднина.
Овие натпревари за нас се добредојдени и преку нив добиваме големо искуство. Тоа е особено важно за нашите млади ракометари, голем процент од нив прв пат играат европско клупско натпреварување.
Спремни го дочекуваме овој натпревар и очекувам квалитетна игра, голема борбеност и мотивираност од моите играчи“, изјави тренерот Кирил Лазаров.
Натпреварот ќе се игра со почеток од 18:45 часот, а директен ТВ преност ќе има на каналите МТВ-3 и Арена Спорт 2.
