Поранешниот напаѓач на Манчестер Јунајтед, Димитар Бербатов го изрази своето разочарување што неговиот некогашен тим е елиминиран од Лигата на шампионите. „Црвените ѓаволи“ завршија на последното место во групата со Баерн Минхен, Копенхаген и Галатасарај. Прими дури 15 голови на шест меча што е најмногу од еден англиски клуб во ЛШ.
„Една екипа треба да биде подготвена за предизвикот во ЛШ, а не да заврши последен во групата. Ако сте последен, чувствувате срам, тага, разочарување и гнев кон вас и вашите соиграчи. Мислам дека Јунајтед не беше подготвен за овој предизвик, а ако немаш квалитет, тогаш нормално е и да губиш. Срамота е да се заврши зад Копенхаген и Галатасарај. Настапот против Баерн не беше добар“, изјави Бербатов.
„Недостатокот на европски фудбал е лоша работа за Манчестер Јунајтед бидејќи на Олд Трафорд му требаат европски ноќи. Тимот не беше доволно добар и заслужи да испадне. Што можете да направите кога ќе се најдете во ваква позиција? Само кревате раце, се извинувате што не сте доволно добри и се враќате на теренот. Таков е фудбалот – има уште една сезона и уште едно место во Лигата на шампионите, нормално ако воопшто се квалификувате“, додаде Бугаринот.
