На отворањето на 20. коло во англиската Премиер лига, екипите на Лутон Таун и лондонски Челзи понудија атрактивен и докрај неизвесен меч, иако гостите имаа висока предност од 0:3, но на крајот од петни жили се бореа да ја задржат победата.
Во 12. минута од натпреварот, Кол Палмер го отвори резултатот и го доведе својот тим во водство од 0:1 (ВИДЕО). Во 37. минута Нони Мадуке по додавање на Палмер ја зголеми предноста на гостите, и со тој резултат се отиде на пауза (ВИДЕО).
Во вториот дел, во 70. минута, Кол Палмер постигна втор гол, со што резултатот беше веќе 0:3 (ВИДЕО) и го најави Челзи како победник. Сепак, Лутон не се предаде.
Во 80. минута Рос Баркли погоди за 1:3 (ВИДЕО), а само седум минути подоцна Адебајо постигна уште еден гол, поставувајќи го конечниот резултат на средбата – 2:3 (ВИДЕО).
Лутон Таун се наоѓа на 18-то место во поредокот со 15 бодови, додека Челзи е на 10. позиција.
