Ракометарките на Ѓорче Петров, по успешното совладување на чешкиот тим Кинжварт се пласираа во четврт-финалето во Европскиот куп. На денешната прес конференција, младите ракометарки рекоа дека не се задоволуваат само со место меѓу осумте најдобри и одат кон реализација на поголеми амбиции.
Следната желба е пласман во финалето во третото по квалитет европско натпреварување во женска конкуренција.
„На почетокот на сезоната тргнавме со цел да го надминеме ланскиот пласман во осминафиналето, во што и успеавме, но мотивирани сме да направиме уште поголем успех – пласман во полуфиналето или во финалето. Се надеваме дека следната година ќе играме во Европската лига, па наскоро и во Лига на шампиони“, вели Ангела Цветановска.
Тренерот Симе Симовски, ракометарките и тактички и технички може да играат за повисок резултат.
„Нема да застанеме тука, иако и ова е голем успех. Не знаеме со кого ќе играме во следно коло, но не запираме тука, продолжуваме со работа и со надградбата. Овие девојки кои се борат за Ѓорче Петров се заборавени од некои структури, но тука покажуваат дека тактички и технички може да играат на високо ниво. Без разлика што ова е трето по ранг натпреварување, нас пласманот во Топ 8 многу ни значи“, изјави Симовски.
Според Блаже Арсов, дипломиран физиотерапевт во Клиника Жан Митрев и официјален физиотерапевт на ЖРК Ѓорче Петров, тие покажаа одличен ракомет,
„Физичката подготвеност на ракометарките е добра, нивната состојба се следи мултидисциплинарно и во тоа се вклучени сите специјалисти од болницата.Нивната состојба се следи и со повремени целосни прегледи, при подготовка пред натпревари, а тимот од Клиника Жан Митрев е поддршка и за време на натпреварите.Сега следи рехабилитација и подготовка за следните натпревари“, истакна Блаже Арсов, дипломиран физиотерапевт во Клиника Жан Митрев и официјален физиотерапевт на ЖРК Ѓорче Петров.
Следните можни противници на Ѓорче Петров на патот кон полуфиналето во Европскиот куп може да биде некоја од екипите на Гранолерс, Елче, Гран Канарија (Шпанија), Михаловце (Словачка), Венло (Холандија), Бенфика (Португалија) и Јаликавак (Турција).
