Англиската фудбалска асоцијација ќе направи промена во фудбалот каква што не е видена во 155-годишната историја, пренесува весникот „Тајмс“. Станува збор за привремено отстранување од игра на 10 минути на фудбалер кој направил груб тактички фаул или се спречкал со судијата. Мерката се очекува да почне да се применува од сезоната 2024/25 и тоа за почеток во ФА Купот.
Се чека само одлуката на Бордот на Меѓународната фудбалска асоцијација (ИФАБ), кој е одговорен за промените на правилата.
Оваа иновација е тестирана на детско и младинско ниво од сезоната 2019/20, но се уште не е искористена на повисоко ниво. Суспензијата се користи во рагби и хокеј на мраз, каде што се покажа дека има застрашувачки ефект врз грубоста на играчите.
