Вечните ривали одиграа меч за историја. За првпат една нивна пресметка мина без навивачки групи, пред едвај 100 навивачи, наместо Куп спектакл, беше траорна атмосфера. И покрај ова двата тима мораа да го бараат мотивот, на крајот во финалето се пласираше МЗТ Скопје, кој славеше против Работнички со 81-76.
Војдан Стојановски беше играчот на мечот, имаше 18 поени, осум асистенции, 4 скока, 6 украдени топки. Ист број на поени имаше Танасковиќ, кој запиша дабл-дабл, имаше 11 скока. На другата страна Трис запиша 20 поени, 19 поени имаше Декоси.
Избраниците на Васко Атанасов отвориј со седум поени во низа, дело на Војдан и Дамјан Стојановски. На другата страна Работнички веднаш имаше одговор, не му дозволи на противникот брзо да дојде до голема предност по новите плус седум (9-2). Нешто подоцна, Ефремовски постигна тројка, Трис со два поени, го донесоа првото водство на својот тим 11-12 во четвртата минута. Водството се менуваше, со тоа што првата четвртина ја добија „сино-белите“ со 26-22.
Во следниот период не гледавме квалитетна кошарка. МЗТ Скопје чуваше минимална позитива, која во 15 минута изнесуваше плус седум (37-30), период во кој Рикиќ не беше на ниво како во првата четвртина, а „сино-белите“ одиграа нешто подобро во одбраната. На одморот резултатот беше на 43-38.
Војдан го отвори второто полувреме со тројка за 46-38, и не застана тука, играше одбрана, остваруваше скокови и благодарение на неговите нови поени, МЗТ Скопје заигра многу подобро. Се надоврзаа Дамајн и Танасковиќ за двоцифрени 55-43 во 24 минута.
Сепак и на другата страна Работнички имаше што да каже. Го искористи отсуството на Војдан на теренот, во три минути направи серија од 12-1 за 56-55. Се врати Војдан, се разигра тимот, Вокру влезе во ритам, веќе во нападот беше полесно, МЗТ поведе со двоцифрени 67-57. Декоси погоди тројка од пола терен за 67-60 на стартот на последната четвртина.
Војдан мораше да излезе на кратко поради четвртта лична грешка, Работнички спушти на 67-62. Неизвесноста се врати по поените Рикиќ за 70-69 на пет и пол минути до крајот. МЗТ Скопје чекореше по тенка линија, одржуваше позитива од четири поени, вака беше на 1:40 до крајот. Џелетовиќ намали на 77-76, Дамјан Стојановски зголеми на 79-76, а притоа судиите не видоа фаул. Работнички не искористи напад, Вокру зголеми на 81-76, останаа 14 секунди, недоволни за нешто повеќе.
Тимот од Аеродром во финалето ќе се сретне со подобриот од Пелистер и Еуро Никел, дуел кој почнува во 19:30 часот.
