Јувентус веќе ја избра замената на Масимилијано Алегри кој ќе го преземе тимот од новата сезона. Тоа е тренерот на Болоња Тиаго Мота, тврди „Фут Меркато“. Бразилецот покажа одлична работа, а со тоа го привлече вниманието.
До неодамна се сметаше дека иднината на Алегри е сигурна и тој ќе продолжи да го води тимот најмалку до 2025 година, кога му истекува договорот. Сепак, низата слаби резултати и излегувањето на тимот од битката за Скудетото ги натера шефовите да ја сменат позицијата и сега е многу поверојатно дека ќе биде сменет по крајот на сезоната и ќе се бара нов тренер да го води.
41-годишниот Тиаго Мота досега има релативно мало искуство во тренерската професија. Кариерата ја започна во младинскиот тим на ПСЖ, а потоа ги водеше екипите на Џенова и Специја.
Од 2022 година е во Болоња. Токму тука е евидентен неговиот талент, бидејќи под негово водство тимот се наоѓа на 4. место на привремениот пласман во Серија „А“ и е сериозен кандидат за настап во Лигата на шампионите следната година.
Неговиот договор со клубот истекува на крајот од сезоната и најверојатно нема да го потпише повторно со оглед на сериозниот интерес од голем број клубови за него.
