Одбојкарите на Штип УДГ се први финалисти во Купот на Македонија во одбојка. На завршниот турнир кој денеска почна токму во Штип, домашните одбојкари мотивирано влегоа на дуелот со Работнички 71&22 и успеаја во експресно брзо време да дојдат до максимална победа.
РАБОТНИЧКИ 71&22 – ШТИП УДГ 0:3 (23:25, 20:25, 18:25)
Најнеизвесен беше првиот сет во кој скопјани одлично се држеа до самиот крај, но Штип УДГ ја искористи првата сет-топка и со 25:23 успеа да поведе со 1:0. Во вториот сет работите како да одеа многу полесно за домашните кои на крајот успеаја доминантно да го добијат со 25:20 за предност од 2:0.
Третиот сет веќе изгледаше на чиста формалност. Работнички 71&22 не успеа да се врати во игра, Штип УДГ одлично си ја одработи задачата и со најубедлива предност обезбеди победа за финале.
Противник на штипјани во неделниот финален меч ќе биде победникот од дуелот меѓу шампионот Струмица и екипата на Лирија кој се игра вечерва од 20 часот.
