Одбојкарките на најдобриот тим сезонава во женската Прва лига, Струмица, се прв финалист во женскиот Куп на ОФМ 2024, откако вечерва во полуфиналето во вистинска драма со 3:2 славеа над големиот ривал Работнички.
СТРУМИЦА – РАБОТНИЧКИ 3:2 (24:26, 24:26, 25:22, 25:17, 15:13)
Струмичанки се вратија од „мртвите“, откако Работнички со неверојатна завршница ги доби првите два сета. Струмица и во првиот и во вториот сет имаше одличен почеток и голема предност која на моменти изнесуваше и +5 поени, но упорните одбојкарки на Работнички успеваа да се вратат во игра и на крајот на двапати со по 26:24 да дојдат до предност од 2:0 во сетови.
Струмица ги среди редовите и успеа во следните два сета добриот старт и предноста да ја задржи до самиот крај. Третиот сет Струмица го доби со 25:22, а четвртиот со убедливи 25:17.
Драмата продолжи во петтиот решавачки сет. Работнички влезе со предност во последните неколку поени, но Струмица успеа со серија од 3:0 да дојде до 15:13 и до победа и пласман во неделното финале, каде за противник ќе го има победникот од мечот меѓу Наковски Волеј и Јанта Волеј.
