Шампионот МЗТ Скопје А. вечерва го почнува настапот во плеј-офот од АБА 2 лигата со првиот четвртфинален дуел на домашен терен против Широки (20 часот), во кој освен победа ќе брка и што поголема разлика.
Тренерот Васко Атанасов е свесен за силината на ривалот, како и за фактот што само заедно и сплотени со илјадниците навивачи можеме да се дојде до посакуваната цел.
„Пред нас е тежок меч против силен противникот, кој ни е должник по поразот во последното коло од регуларниот дел. Ова е сосема поинаков дуел, подготвени сме за предизвикот, а ќе ја имаме и помошта од нашите верни навивачи, кои верувам дека во голем број ќе се најдат на трибините. А, кога салата е исполнета до крај, на ниту еден противник не му е лесно во Аеродром, бидејќи во такви услови секогаш играме далеку подобро од моменталните можности. Верувам во моите кошаркари и очекувам натпревар во кој ќе дојдеме до посакуваната цел“, вели Атанасов.
Реванш-дуелот се игра следната среда во Широки Бријег.
